Голандийы, Лоусдены горæты æфсæддон уæлмæрдыл ныгæд «Æнæзонгæ æфсæддоны» уæлмæрдыл тагъд Ванишвили Симоны ном фыст æрцæудзæн. «ДНК»-йы анализ йæ хиуæттæ (хæстæджытæ) 2019 азы 1-æм декабры райстой.

«Мæ фыдæй райстой ДНК-йы анализ æмæ цалдæр мæйы æнхъæлмæ касты фæстæ, ивгъуыд къуырийы райстам дзуапп. Ист ДНК-йы анализ разынд æмхуызон, æвæрццæг у», - зæгъы Ванишвили Сосо, Ванишвили Симоны æфсымæры хъæбулы хъæбул.
Ванишвили Симоны (Сикъо) 1941 азы акодтой Стыр Фыдыбæстæйон хæстмæ.

«Ацыд æмæ ацыд … йæ царды фæстаг бонты онг æм фенхъæлма касти йæ бинойнаг Кердихъошвили Еличка. Нал дæр дзы фыстæг райстой, нæдæр ныцыхуызон дзуапп, æнхъæлмæ кастысты йе ‘рыздæхтмæ. 78 азы фæстæ, ацы уалдзæджы нæм фæдзырдта Миладзе Заза æмæ нын фехъусын кодта, зæгъгæ, дам Голандийы Лоусдены горæты æфсæддон уæлмæрдыл ныгæд 15 гуырдзиагæй гæнæн ис æмæ сæ иу уа мæ дадайы æфсымæр, Ванишвили Симон, кæцыйы нацисттæ фехстой 15 гуырдзиаг салдатимæ иумæ, голандиаг партизантимæ бастдзинады æмæ уыдонæн хæстон æрмæг дæттыны тыххæй», - зæгъы Ванишвили Сосо.

Иннæ 14 æфсæддоны сбæрæг кæнынмæ та цы хауы, уымæй, дарддæр кæнынц сæ куыст, цæмæй сбæлвырд кæной чи сты уый.