Aдвокат Бадри Манджавидзейы инициятивамæ гæсгæ Тбилисы, Самгоры районы иу уынгыл, ирон поэты æмæ тæлмацгæнæджы Бестауты Георгийы ном сæвæрдтой.

Бестауты Георгий Гуры районы гуырд ирон поэт æмæ тæлмацгæнæг уыд. Уый гуырдзиаг æвзагыл ратæлмац кодта Хетæггаты Къостайы æмдзæвгæтæ; ирон æвзагыл – «Стайыцармдæрæг» æмæ ноджы бирæ гуырдзиаг фыссæгты айвадон фыстытæ. Поэт иу рæстæг журнал «Ирыстоны» сæйраг редакторæй куыста Цхинвалы.
Йæхæдæг идейы автор куыд банысан кодта – «ныффæстиат хъуыддаг уыд йæ саргъ кæнын.»

Адвокат æмæ барты хъахъхъæнæг Бадри Манджавидзе 2019 азы декабры мæйы Цхинвалы уыдис æмæ бабæрæг кодта поэты ингæн. Цхинвалæй куы æрæздæхт, Тбилисы муниципалитеты уагдонмæ бахаста хъусинаг, цæмæй Тбилисы иу уынгыл сæвæрдтайккой ирон цытджын поэты ном. Уагдон ацы хъуыддаг фарон аскъуыдздзæг кодта æмæ Самгоры районы иу уынгыл Бестауты Георгий ном сæвæрдтой æмæ 2021 азы декабры ацы уынгыл разындысты уынджы æвдисæг баннертæ дæр.

«Ирон æмæ гуырдзиаг адæмттæн ныффæстиат, фæлæ арфæйаг хабар у, æрæгмæ хуыздæр у – куыд фæзæгъынц æмæ еныр Цхинвалы рад у! Æцæгæй æмбæлы ацы лæгæн йæ ном макуы уæд рохуаты, уыцы сахары дæр кæм архайдта йæ царды фæстаг азты.» - загъта Бадри Манджавидзе.
Поэт 1978-æм азы фæзиан, ныгæд у Цхинвалы уæлмæрды.