10 аздзыд Гиорги Нахъишашвили арӕх уыны мобилон тилифоны постты, кӕм ӕмбӕстӕгтӕ ӕххуыс курынц.

«Иу бон мын афтӕ — гыцци, ӕри ӕртымбыл кӕнӕм ӕхца, исты, дам, ауӕй кӕнӕм. Зӕгъын, хъӕбул, цы ауӕй кӕнӕм? Уыцы минуты ницӕуыл хъуыды кодтон» — дзуры нын Тедеты Натъо, кӕцы 10 аздзыд Гиорги Нахъишашвилийы мад у.

Уыцы постты фӕстӕ Гиорги райдыдта Карелы чи уыдис зындзинады хауд, уый бӕрӕг кӕнын.



«Бирӕ истори фехъуыстам. Загътой нын, зӕгъгӕ дӕнцӕгӕн, хъӕуты мӕгуыр сывӕллӕттӕ цӕрынц. Ноджы нын радтой информаци ӕмӕ иу сывӕллоны ток ныццӕвта ӕмӕ йӕ фӕсарӕнмӕ акодтой, зӕгъгӕ. Федтам ноджы Карелы къордтӕ дӕр социалон ӕхсанхызы, кӕм дӕр уыдис зындзинады цы бинонтӕ сты, уыдоны фенын.» — йӕ зӕрдыл ӕрлӕууын кӕны Тедеты Натъо.

Гиорги ӕрхъуыды кодта ӕмӕ хъӕуы йӕ деду цы тыллӕг ӕркӕны, раст уымӕй хъуамӕ спайда кӕна хӕрзиуӕг хъуыддаджы мидӕг:

«Хъӕуы деду ӕркӕны тынг бирӕ тыллӕг. Ис ӕм алы дыргъ дӕр. Дедуйӕн цы тыллӕг ис, уый, дам, ауӕй кӕнӕм ӕмӕ ӕхца йӕм арвитӕм.» — дзуры Тедеты Натъо.



Ӕцӕгӕй дӕр, хъӕуӕй ӕрластой дыргъ — фӕткъуы, сӕнӕфсир, индзыр; байуӕрстой агуывзӕтӕ ӕмӕ сӕ уӕй кӕнынмӕ рахастой.

«Фыццаг бон куы рахастам, мах дӕр не 'нхъӕлдтам куы сӕ фӕуӕй кодтайккам. 20 лари 'ртымбыл кодтам. Иу агуывзӕ иу лари куы кӕны, мах 20 ларийы ауӕй кодтам ӕмӕ цин кодтой сывӕллӕттӕ.» — Дзуры Натъо.
Дыггаг хатт цалдӕр боны фӕстӕ сарӕзтой базар. Еныр та ӕндӕр дыргътӕ дӕр бафтыдтой:

«Ӕз Гиоргийы ӕмбал дӕн, куы федтон ахӕм цыдӕр арӕзта, ӕз дӕр ын феххуыс кодтон. Ам стӕм ноджы цалдӕр лӕппу, кӕцытӕ баиугонд стӕм ацы хабары» — дзуры Андрия Абашишвили.