Цхинвалы æввахс рæстæджыты сабиты рынчындоны ног бæстыхай байгом уыдзæнис.

Ай фæдыл дæргъвæтин статья фыссы газет «Хуссар Ирыстон».

Газеты бæрæггæнæнтæм гæсгæ, рынчындон 2011 азæй райдыдтой аразын æмæ йын фæуын нæ бантыст.

«Ацы объект у уыцы бæстыхæйттæй сæ иу, кæцы азты дæргъы арæзт цыд. Бæстыхайы аразын райдыдтой 2011 азы, фирма «Леиа» та йæ æххæст кодта». – Фыссы газет.

Ныртæккæ, ацы куыстытæ æххæст кæны Цæгат Ирыстоны арæзтадон компани «Спецтепломонтаж».
Фирма «Леиа»-йы райдайгæ арæзтад, проектон документацийы нæ уæвынадмæ гæсгæйæ, ивгъуыд азы сæрды æрлæууыд æмæ финансгонд дæр нал æрцыд.

Фыццаг арæзтады рæстæджы æртæ уæладзыджы арæзт æрцыд, фæлæ дыууæ азы дæргъы бæстыхайæн йæ сæр нæ бамбæрзтой.

Абоны уавæрмæ гæсгæйæ, бæстыхай æмбæрзт у æмæ хæрз тагъд рæстæджы цы ног хай арæзт æрцыд уый дæр æмбæрзт æрцæудзæнис. Ныртæккæ дзы цæуы мидæгон куыстытæ.

Арæзтады кусы 75 адæймаджы. Уыдон сты, куыд Цæгат Ирыстонæй æрцæугæтæ, афтæ бынæттон цæрджытæ дæр.

Газет ма, ноджы дыууæ æрдæгарæзт бæстыхайы фæдыл, фыссы.

«Сæрмагондæй, æрдæгарæзт у дыууæ уæладзыгон бæстыхай, кæцы рынчындонмæ æввахс территорийыл ис. Специалистты ныхасмæ гæсгæ, бæстыхай аварион у æмæ æнæхъæнæй хъуамæ пырхгонд æрцæуа, æмæ, йæ бынаты та хъуамæ арæзт æрцæуа дыууæ уæладзыгон операцион хирургион корпус. Ног корпус иугонд æрцæудзæнис республикон рынчындонмæ. Рынчындоны зæронд бæстыхайы демонтажы фæстæ та арæзт æрцыд æртæуæладзыгон гуырæн хæдзар, уымæн æмæ уæдыккон гуырæн хæдзар нал дзуапп кæны ныры медицинон нормæтæн. Дыууæ медицинон уагдоны арæзтад дæр 2017 азы фæуыдзæнис. Инвестицион программæйы æвæрд ис медицинон аппаратурæйы балхæнын», - кæсæм газеты.