Карелы муниципалитеты Земо (Уæллаг) Лететы хъæумæ фистæгæй ссыдыстæм. Фæндаг дзæвгар къуылдым у, боныхъæд – къæвдаджын. Ахæм бон специалонæй равзæрстам, уымæн æмæ бынæттон цæрджытæ арæх фæзæгъынц, цæмæй къæвдаджын, митджын æмæ цъыф рæстæджы хъæумæ бацæуын уæлдай зындæр вæййы.

Фæндаг райдыдтам Квемо (Дæллаг) Лететæй. Чысыл цæугæдоныл ахызтыстæм æмæ къуылдымыл райдыдтам хизын. Зæхх уыд умæл æмæ цæхджын – къах бырыд æмæ нæ къахыдарæс нæ урæдта. Дыууæ километрмæ æввахс фадыг уыдзæн, кæцыйыл цæуын дзæвгар зын у.

Нарæг фадыгыл ныл бæрзонд автомобил амбæлд, кæцы сабыргай, тулгæйæ æмбæрзта фæндаг. Фæндаг тынг нарæг кæй у, уымæ гæсгæ тагъд-тагъд схызтыстæм бæрзонддæр ранмæ, цæмæй хæдтулгæ сæрибарæй ахызтаид. Æдæппæт ныл дыууæ хæдтулгæйы амбæлдис – аргъуанæй здæхтысты. Куыд зыны афтæмæй, райсомæй скуывтой Саркийы Сыгъдæг Георгийы аргъуаны, кæцымæ хуыцаубоны арæх фæцæуынц кувæг адæм.



Фæстагмæ бахæццæ стæм Земо (Уæллаг) Лететы хъæумæ. Уый хæрз чысыл хъæу у, æмæ йын ис централон фæзуат. Фæзуаты суадон цæуы, цыран нæ къухтæ ныхсадтам, фæлæ цасдæр рæстæджы фæстæ дон нал цыд.

Райдыдтам бынæттон цæрæджы агурын æмæ иу хæдзарæй, гом къулдуары цурмæ, иу нæлгоймаг рахызт. Уымæн нæ цыды нысан радзырдтам – цымыдис нæ кодта, фæндаг æмæ доны проблемæтæ куыд бæстонгонд æрцыдысты, уый.

Нæ фысым, Гелашвили Суликъо нын радзырдта:

«Нырма махы онг ницы æрбахæццæ. Фæндаг нæм нæй. Зымæджы, цъыф боныгъæды, æрмæстдæр дыууæхидон хæдтулгæтæн сæ бон у ахизын. Иуæй-иу хатт зымæджы бынтондæр ахицæн вæййæм дунейæ. Ногæй нæм ницы ис æмæ æрмæст æнхъæлмæ кæсæм».



Доны проблемæйы тыххæй дæр нын радзырдта:

«Дыууæ къуырийы размæ йæ сцалцæг кодтой, фæлæ йæ æцæгæй та æрмæст «сарæзтой». Зæронд трубæтæ систой æмæ ногтæ сæвæрдтой, фæлæ нæм уæдæй фæстæмæ дон нал ис. Дон куы æрæмбырд вæййы, уæд æй байгом кæнæм æмæ та йæ ногæй сæхгæнæм. Ныр сымах цы бахардз кодтат, уый æмбырд дон уыд трубæйы. Донгуырæнæй дон æртахгай цæуы æмæ цъусгай æрæмбырд кæны. Æвæццæгæн æрдæг сахаты фæстæ ногæй нæ къухтæ ныхсын нæ бон уыдзæн».

Йæ ныхæстæм гæсгæ, хъæуы цæрджыты уавæр ноджы уæззаудæр у:

«Хъæдæй хæссæм соцъи, нæзы. Мæ сабибонты дуджы хъæу уыдис йедзаг – куыста æртæ «биржæ», бинонты хсæн фондз адæймагæй къаддæр нæ цардис. Ацы хæдзары, зæгъæм, цардысты 12 адæймаджы. Абон-ма хъæуы баззад æрмæстдæр æртæ бинонтæ – иу дзы мæ чындз у, иу уæлейæ цæры æмæ иу та Пилишвили Лейлæ».